Vancung Tu ah Chaw Khong Uh
(Lyrics)
Key: Eb
[Verse 1]
Minung nih kan kawl i kan khawn tawnmi
Sui le ngun chawva hna zong nih
Hnangamnak tak an pe kho lo
Duhfak hakkoh tertu men an rak si
Hmanhseh Bawipa Jesuh nun ngeitu cu
Zeihmanh ngei mi um hlah hmanhseh
Nun in a rum bik mi an si caah
Kan duhbik le hngarbik ding mi an si.
[Chorus]
Rungrul le cirik nih an ei khawh i
Mifir nih an fir i an boh khawhnak
Vawlei ah hin nan chaw khong hlah uh
Vancung tu ah khin nan chaw khong uh
Vawlei cung caan tawite kan nunchungah
Sifak le santlai lo minau ta hmanh khi
Nan pek nan zoh khen i nan conglawmh cun
Vancung khua ah chawva nan khon a si.
[Verse 2]
Jesuh nih cun mirum tlangval pa cu
Mitling si na duh cun kal law
Na ngeihmi thil vialte kha zuar law
Tangka na hmuhmi kha sifak pe hna
Keimah ruangah zeizong vialte kaltak
I ka hnu a ka zulmi cu
Zungzal nunnak kha ka pek hna lai ii
Vancung khua ah chawva nan ngei lai a ti.
[Verse 3]
Eiawk le dinawk ca lawng kha ruatin
Lungrethei vansang in um hlah
Zeicah tiah hi thil hna cu
Vawlei mi nih an kawl tawnmi a si
Vancung khua i a ummi nan pa nih
Nan herhmi thil kha hngal dih ko uh
A pennak kha biapi bik chia law
Thildang vialte zong kha na pek hna lai.
