Nan Ngai Tuk Ṭheu Lai
(Lyrics)
Key: D
[Verse 1]
Ram dang a kal hawidawt hna
A lang lo lai khua in ee
Ringawn aw dawh zaihla in
Ngaihnak thawng kan I hal hna
Dam tein nan um hna maw?
Thawngpang dang hna a ṭha maw?
Lairam nan kaltak zan cu
Kan thlavai kiang tuk cio hna.
[Verse 2]
Nilin lakah thlanti he
Rianhrang nan ṭuan zawng ahcun
Kan Lairam cerhti kikte
Nan ngaituk ṭheu lai ka ti
Nan retheih ṭhabat caan ah
Nan ni dor tawnnak Lairam
Runrep lo nan inn te kha
Nan ngaituk ṭheu lai ka ti.
[Chorus]
Ṭhal khua nih hung pau ṭhan i
Tlangkip meithang zam hna le
Thankawng fiakfaiva hna nih
Lairam thingpar sang cungain
Lungleng ngai in rung awn kaw
Liam cia zuunthing hlawi ṭhan hna
Zaang tlung kho lo kan semnak
Lairam nan kaltak ni cu.
[Verse 3]
Ram dang kan um zong ah ee
Kan philh lai lo khua te kha
Kan rak ngai tuk cang tiin
Thawng nan rak hal lio caan ah
Hawidawt cheukhat cu leidai
Tang an liam cang ee ti thawng hna
Nan theih Zawnah nan lunglen
Zeidek lawh ve hnga ka ti.
[Verse 4]
Laimi cu kan ram a hme
Minung nih kan tlawm fawn i
Nan rak kir ṭhan zawn ahcun
Lairam rak panh te uh mu
Mitcaw le kebei lawng nih
Ram an hruai kho ti lo e
Hmaihngal pi tlak lai pasal
Lairam nih an ngai tuk cang.
[Chorus]
Lungretheih nan ton caan le
Nan lung hnabei dongh can ah
Cuangchin a thu Mangbawi sin
Khupbil thlaza cam uh law
Kum can a liam lengmang bang
A liammi na caan hna kha
Man ngei tein hman i zuam
Lairam ṭhanchonak caah.
